У ПВТ выбудоўваліся чэргі, каб пакінуць подпіс за Лукашэнку? Праваабаронца распавядае, пра што гэта сведчыць
З сёмага лістапада па шостае снежня ў Беларусі збіраюць подпісы за "вылучэнне кандыдатаў у прэзідэнты". У дзяржаўных СМІ з’яўляюцца рэпартажы аб выбарчых пікетах, але часцей за ўсё асвятляюцца зборы подпісаў у падтрымку Аляксандра Лукашэнкі. 13 лістапада дзяржаўнае інфармацыйнае агенства "БЕЛТА" апублікавала рэпартаж з выбарчага пікета на тэрыторыі Парка высокіх тэхналогій у Мінску. Нагадаем, што менавіта айцішнікі Беларусі ў 2020-м годзе актыўна падтрымалі пратэст супраць Лукашэнкі. Цяпер жа на фотаздымках паказалі, як днём праграмісты і праграмісткі выбудоўваюцца ў чэргі каля намётам з лозунгам "НАДО!", каб пакінуць подпіс у падтрымку Лукашэнкі. Праваабаронца Алег Мацкевіч пракаментаваў сітуацыю.
"Нават з гэтага скупога на падрабязнасці афіцыйнага рэпартажу аб зборы подпісаў за вылучэнне кандыдатам у прэзідэнты Аляксандра Лукашэнкі на тэрыторыі Парка высокіх тэхналогій у Мінску можна зрабіць пэўныя высновы.
- Збор подпісаў за Лукашэнку 13 лістапада на тэрыторыі ПВТ
Вярхі па-ранейшаму не грэбуюць выкарыстоўваць на поўную моц адміністратыўны рэсурс. Пад гэтым маецца на ўвазе ўжыванне ў выбарчым працэсе наяўнага матэрыяльнага і чалавечага патэнцыялу пры дапамозе дзяржаўных інстытуцый і ўплыву на карысць кандыдатаў ад улады. Фармальна ў дзеючым выбарчым заканадаўстве Беларусі не існуе нормаў, якія б наўпрост забаранялі гэтую прыкрую з’яву. Але з пункту гледжання празрыстасці выбарчага працэсу, раўнапраўя ўсіх яго ўдзельнікаў выкарыстанне адміністратыўнага рэсурсу падрывае прынцыпы справядлівых і чэсных выбараў і давер да іх вынікаў.
- Збор подпісаў за Лукашэнку 13 лістапада на тэрыторыі ПВТ
Парк высокіх тэхналогій, у якім адбыўся вельмі грунтоўна падрыхтаваны, як бачна па фотаздымках, збор подпісаў, з’яўляецца па сутнасці, дзяржаўным прадпрыемствам. Гэта азначае, што падобныя мерапрыемствы праводзяцца не толькі са згоды, але і з актыўнай падтрымкай кіраўніцтва ўстановы, якое стварае больш спрыяльныя ўмовы для Лукашэнкі. Да таго ж, выкарыстанне пляцовак, якія не прызначаны для такога роду мерапрыемстваў, падкрэслівае нявызначанасць паміж дзяржаўнымі інтарэсамі, бізнесам і палітычнымі патрэбамі ўлады. Гэта вядзе да глыбейшага ўкаранення палітычных інтарэсаў у бізнес-асяроддзе і стварае прэцэдэнт, калі яно павінна прыстасоўвацца да палітычнай кан’юнктуры, нясучы ў тым ліку іміджавыя страты. Гэта можа прывесці да зніжэння даверу з боку партнёраў і інвестараў ПВТ".